રશિયાના રાષ્ટ્રપતિ વ્લાદિમીર પુતિન મંગળવારે રાત્રે બે દિવસના પ્રવાસે ચીન પહોંચ્યા. બીજિંગ એરપોર્ટ પર ચીનના વિદેશ મંત્રી વાંગ યીએ તેમનું સ્વાગત કર્યું.
પુતિન આ પ્રવાસ દરમિયાન ચીનના રાષ્ટ્રપતિ શી જિનપિંગ સાથે મુલાકાત કરશે. તેમનો આ પ્રવાસ એવા સમયે થઈ રહ્યો છે, જ્યારે ગયા અઠવાડિયે અમેરિકી રાષ્ટ્રપતિ ડોનાલ્ડ ટ્રમ્પ પણ બીજિંગના પ્રવાસે ગયા હતા.
ચીનના વિદેશ મંત્રાલય અનુસાર, બંને નેતાઓ વચ્ચે બંને દેશોના સંબંધો, વેપાર, વ્યૂહાત્મક સહયોગ અને વિશ્વની વર્તમાન પરિસ્થિતિ પર ચર્ચા થશે. પુતિન ચીનના વડાપ્રધાન લી કિયાંગ સાથે પણ મુલાકાત કરી શકે છે.
ચીન પહોંચતા પહેલાં જારી કરાયેલા વીડિયો સંદેશમાં પુતિને કહ્યું કે રશિયા અને ચીનના સંબંધો અભૂતપૂર્વ સ્તરે પહોંચી ગયા છે. તેમણે કહ્યું કે બંને દેશો વચ્ચે વિશ્વાસ, પરસ્પર સમજણ અને સમાન સહયોગનો સંબંધ છે.
પુતિને કહ્યું કે બંને દેશો સાર્વભૌમત્વ અને રાષ્ટ્રીય એકતા જેવા મુદ્દાઓ પર એકબીજાને સમર્થન આપે છે. તેમના મતે, રશિયા અને ચીન રાજકારણ, અર્થતંત્ર અને ઊર્જા સહિત અનેક ક્ષેત્રોમાં સહયોગ વધારી રહ્યા છે.
અમેરિકા-રશિયા વચ્ચે સંતુલન જાળવી રહ્યું ચીન
ટ્રમ્પ પછી હવે પુતિનની મુલાકાતને લઈને જાણકારોનું કહેવું છે કે સતત થઈ રહેલી આ મોટી મુલાકાતો દર્શાવે છે કે ચીન એકસાથે અમેરિકા અને રશિયા બંને સાથે સંબંધો સંતુલિત રાખવાનો પ્રયાસ કરી રહ્યું છે, ખાસ કરીને એવા સમયે જ્યારે યુક્રેન અને ઈરાન સંબંધિત મુદ્દાઓ પર વૈશ્વિક તણાવ પ્રવર્તી રહ્યો છે.
નિષ્ણાતોનું માનવું છે કે ચીન પાસે આ તક છે કે તે એકસાથે અમેરિકા અને રશિયા બંને સાથે વાતચીત કરીને પોતાની વૈશ્વિક ભૂમિકાને મજબૂત દર્શાવે.