ટ્રમ્પે યુદ્ધ રોકવા માટેની ઈરાનની ઓફર ફરીથી ફગાવી દીધી છે. તેમણે શુક્રવારે મોડી રાત્રે કહ્યું કે, “વાતચીત માટે ઈરાનની નવી ઓફર પણ મને મંજૂર નથી. ઈરાનનું નેતૃત્વ ગૂંચવાયેલું છે અને ખરાબ રીતે વિખેરાઈ ગયું છે. તેઓ સમજૂતી કરવા માંગે છે પરંતુ અંદરોઅંદર સહમત થઈ શકતા નથી.”
આ અગાઉ ઈરાન 26 અને 27 એપ્રિલે પણ પોતાના પ્રસ્તાવ મોકલી ચૂક્યું છે જે ટ્રમ્પે ફગાવી દીધા હતા. ટ્રમ્પે એમ પણ કહ્યું કે અત્યારે તેમની ઈરાન સાથે ફોન પર જ વાતચીત ચાલી રહી છે. વ્હાઇટ હાઉસના એક અધિકારીના જણાવ્યા અનુસાર, ઈરાને તેના નવા પ્રસ્તાવમાં પરમાણુ મુદ્દાનો ઉલ્લેખ કર્યો નથી. ઈરાનનું કહેવું છે કે જો આ મુદ્દે પછીથી વાત કરવામાં આવે, તો તે હોર્મુઝને તાત્કાલિક ખોલી દેશે.
ટ્રમ્પ કહી ચૂક્યા છે કે ઈરાનને પરમાણુ હથિયાર બનાવવા દઈ શકાય નહીં. ઈરાને વાટાઘાટો માટે આવતા પહેલા સંવર્ધિત યુરેનિયમ (enriched uranium) સોંપવું પડશે. ઈરાને આ નવો પ્રસ્તાવ પાકિસ્તાની આર્મી ચીફ મુનીર દ્વારા ટ્રમ્પને મોકલ્યો હતો.
દરમિયાન, અમેરિકાએ તેના નાટો સહયોગી જર્મનીથી 5,000 સૈનિકો હટાવવાનો નિર્ણય લીધો છે. અગાઉ જર્મન ચાન્સેલર ફ્રેડરિક મર્જે ટ્રમ્પ સરકારની ટીકા કરી હતી અને કહ્યું હતું કે અમેરિકાએ ઈરાન સામે અપમાનિત થવું પડી રહ્યું છે. આનાથી ટ્રમ્પ નારાજ થયા હતા.