મિડલ-ઈસ્ટમાં ચાલી રહેલા તણાવ વચ્ચે ઈરાનના નવા સુપ્રીમ લીડર મુજતબા ખામેની કોમામાં હોવાનો દાવો કરવામાં આવી રહ્યો છે. મુજતબા 28 ફેબ્રુઆરીએ ઈઝરાયલ-અમેરિકાની એર સ્ટ્રાઈકમાં ગંભીર રીતે ઘાયલ થયા હતા.
બ્રિટિશ મીડિયા ‘ધ સન’ના રિપોર્ટ મુજબ, આ હુમલામાં મુજતબાને એટલી ગંભીર ઈજાઓ થઈ હતી કે તેમનો એક પગ કાપવો પડ્યો હતો અને પેટ-લિવરને પણ નુકસાન પહોંચ્યું છે. આથી તેઓ કોમામાં છે.
મુજતબાએ પોતાના પિતા અને ઈરાનના પૂર્વ સુપ્રીમ લીડર અલી ખામેનીના અવસાન બાદ 9 માર્ચે સુપ્રીમ લીડરનું પદ સંભાળ્યું હતું. તેમની સ્થિતિ અંગે હજુ સુધી ઈરાન સરકાર તરફથી કોઈ સત્તાવાર માહિતી સામે આવી નથી.
બીજી તરફ, પ્રધાનમંત્રી નરેન્દ્ર મોદીએ ઈરાનના રાષ્ટ્રપતિ ડૉ. મસૂદ પજશકિયાન સાથે ફોન પર વાત કરી છે. આ દરમિયાન પીએમએ મિડલ-ઈસ્ટની સ્થિતિ પર ચર્ચા કરી. મોદીએ ક્ષેત્રમાં વધતા તણાવ, નાગરિકોના મોત અને સિવિલ ઈન્ફ્રાસ્ટ્રક્ચરને થયેલા નુકસાન પર ઊંડી ચિંતા વ્યક્ત કરી.
ઈઝરાયલના પ્રધાનમંત્રી બેન્જામિન નેતન્યાહુએ કહ્યું કે ઈરાનના નવા સુપ્રીમ લીડર મુજતબા ખામેની માટે કોઈ લાઈફ ઈન્શ્યોરન્સ નથી. તેમણે કહ્યું કે ઈરાન વિરુદ્ધ અમેરિકા-ઈઝરાયલનું સૈન્ય અભિયાન અપેક્ષા કરતાં વધુ સારું ચાલી રહ્યું છે. ઈઝરાયલ આતંકી સંગઠનોના કોઈપણ નેતાને નિશાન બનાવી શકે છે.