અમેરિકી સુપ્રીમ કોર્ટના ટેરિફ રદ કરવાના નિર્ણયના ત્રણ કલાકની અંદર જ ડોનાલ્ડ ટ્રમ્પે દુનિયાભર પર 10% વધારાનો (એક્સ્ટ્રા) ટેરિફ લગાવવાની જાહેરાત કરી દીધી છે.
તેમણે પોતાના નિવેદનમાં જણાવ્યું કે તેઓ આજે એક આદેશ પર હસ્તાક્ષર કરશે, જેના હેઠળ 10% નો એક્સ્ટ્રા ગ્લોબલ ટેરિફ લાદવામાં આવશે. તેમણે સ્પષ્ટ કર્યું કે આ ટેરિફ પહેલેથી લેવામાં આવતા બેઝલાઇન ટેરિફ ઉપરાંતનો હશે. એટલે કે અત્યારે જે ટેરિફ લેવાય છે, તેના પર આ નવો 10% વધારાનો ટેરિફ લાગુ પડશે.
આ પહેલા શુક્રવારે સુપ્રીમ કોર્ટે રાષ્ટ્રપતિ ડોનાલ્ડ ટ્રમ્પના ગ્લોબલ ટેરિફને ગેરકાયદેસર ગણાવી રદ કર્યા હતા. કોર્ટે 6-3ની બહુમતીથી ચુકાદો આપતા કહ્યું હતું કે બંધારણ મુજબ ટેક્સ અને ટેરિફ લગાવવાનો અધિકાર રાષ્ટ્રપતિને નહીં, પણ માત્ર સંસદને છે.