જર્મનીના મ્યુનિકમાં આયોજિત એક કાર્યક્રમમાં પાકિસ્તાનના આર્મી ચીફ ફિલ્ડ માર્શલ આસિમ મુનીરને એન્ટ્રી ગેટ પર સુરક્ષા અધિકારી દ્વારા રોકવામાં આવ્યા હોવાનો વીડિયો સોશિયલ મીડિયા પર ઝડપથી વાયરલ થઈ રહ્યો છે. આ ઘટના તે સમયે બની જ્યારે મુનીર મ્યુનિક સિક્યોરિટી કોન્ફરન્સમાં સામેલ થવા પહોંચ્યા હતા. વીડિયોમાં દેખાય છે કે સુરક્ષા અધિકારી તેમને કહે છે કે પોતાનું ID કાર્ડ આગળની તરફ કરી લો જેથી તે સ્પષ્ટ દેખાઈ શકે. અધિકારી પોતે પોતાના બેજ પર ટેપ કરતા મુનીરને પણ તેમ જ કરવાનો ઈશારો કરે છે. આ બધું કોન્ફરન્સના પ્રવેશદ્વારથી થોડાક જ ડગલાં દૂર થયું.
આ દરમિયાન, જર્મનીમાં સ્થિત એક સિંધી રાજકીય સંગઠન જેય સિંધ મુત્તાહિદા મહાજ (JSMM)એ મ્યુનિક સિક્યોરિટી કોન્ફરન્સમાં પાકિસ્તાની આર્મી ચીફને બોલાવવા સામે સખત વાંધો ઉઠાવ્યો છે. સંગઠને આને “ગંભીર રીતે દુર્ભાગ્યપૂર્ણ” ગણાવ્યું અને આંતરરાષ્ટ્રીય સંસ્થાઓને આ બાબતે ધ્યાન આપવા અપીલ કરી છે.
JSMMના કાર્યકરોએ કાર્યક્રમ સ્થળની બહાર વિરોધ પ્રદર્શન પણ કર્યું. પ્રદર્શનકારીઓએ પાકિસ્તાનમાં કથિત માનવાધિકાર ઉલ્લંઘનોને લઈને અવાજ ઉઠાવ્યો. JSMMના ચેરમેન શફી બુરફતે સંયુક્ત રાષ્ટ્ર (UN), યુરોપિયન યુનિયન (EU), જર્મન સરકાર અને આંતરરાષ્ટ્રીય માનવાધિકાર સંગઠનોને સંબોધિત એક નિવેદનમાં જણાવ્યું કે તેમને આસિમ મુનીરની આ વૈશ્વિક મંચ પર હાજરી જોઈને “ઊંડું દુઃખ અને વાંધો” છે.
મ્યુનિક સિક્યોરિટી કોન્ફરન્સને વિશ્વના અગ્રણી મંચોમાંનું એક માનવામાં આવે છે, જ્યાં દર વર્ષે વિશ્વના નેતાઓ, રાજદ્વારીઓ અને સુરક્ષા નિષ્ણાતો આંતરરાષ્ટ્રીય શાંતિ, સુરક્ષા અને વૈશ્વિક સંકટો પર ચર્ચા કરવા માટે એકઠા થાય છે.