સિંગતેલમાં સટ્ટાખોરી ત્રીજા દિવસે પણ ચાલુ રહી હતી. ગુરુવારે રૂ. 50નો વધારો થયો હતો. જેને કારણે સિંગતેલના ડબ્બાનો ભાવ રૂ. 3100 ને પાર થઈ રૂ. 3120 થયો હતો. તંત્રનો કોઈ અંકુશ નહીં હોવાને કારણે સટ્ટાખોરો ફાવી ગયા છે. સિંગતેલના ભાવ ઊંચકાતા મગફળીના ભાવ પણ વધ્યા હતા. મગફળીના ભાવે રૂ.1600 ની સપાટી કુદાવી હતી.
તહેવાર પૂરા થયા બાદ ઊઘડતી બજારે સિંગતેલ- કપાસિયા તેલમાં ભાવ સતત વધી રહ્યા છે. મંગળવારે રૂ. 70 , બુધવારે પણ રૂ. 30 વધ્યા બાદ ગુરુવારે રૂ. 50નો વધારો થયો હતો. આમ, ત્રણ દિવસમાં સિંગતેલનો ડબ્બો રૂ.150 મોંઘો થયો છે. સિંગતેલ લૂઝનો ભાવ રૂ.1750-1780 બોલાયો હતો. જ્યારે કપાસિયા વોશમાં 810-815 ના ભાવે સામાન્ય ટેન્કરના કામકાજ નોંધાયા હતા. ઓગસ્ટ મહિનામાં વરસાદ આવ્યો નથી. આથી,વરસાદ ખેંચાયો છે. વરસાદ ખેંચાતા મગફળીનો પાક નિષ્ફળ જવાની ચિંતા સેવાઈ રહી છે. ગુરુવારે જાડી મગફળીની આવક 700 ક્વિન્ટલ, ઝીણી મગફળીની આવ 950 ક્વિન્ટલ નોંધાઈ હતી. ભાવમાં મણે રૂ.10 નો વધારો થયો હતો.