ખરાબ હવામાનને કારણે આંતરરાષ્ટ્રીય અવકાશ મથક માટે લોન્ચ થનાર એક્સિઓમ-4 મિશન મુલતવી રાખવામાં આવ્યું છે. હવે તે 11 જૂને ભારતીય સમય મુજબ સાંજે 5.30 વાગ્યે લોન્ચ કરવામાં આવશે.
ભારતીય અવકાશ સંશોધન સંગઠને X પરની એક પોસ્ટમાં આ માહિતી આપી છે. ISRO ચીફ વી નારાયણને જણાવ્યું હતું કે ફ્લોરિડાના કેનેડી સ્પેસ સેન્ટરથી સ્પેસએક્સના ફાલ્કન-9 રોકેટનું લોન્ચિંગ મુલતવી રાખવામાં આવ્યું છે.
આ ત્રીજી વખત છે જ્યારે તેનું લોન્ચિંગ મુલતવી રાખવામાં આવ્યું છે. અગાઉ, મિશન 29 મેના રોજ લોન્ચ થવાનું હતું. બાદમાં તે 8 જૂનના રોજ શરૂ થવાનું હતું. ત્યારબાદ તે 10 જૂને સાંજે 5.30 વાગ્યે શિડ્યુલ કરાયું હતું.
એક્સિઓમ મિશન 4 (એક્સ-4)માં, ચાર દેશોના ચાર અવકાશયાત્રીઓ 14 દિવસ માટે અવકાશ મથકે જઈ રહ્યા છે. શુભાંશુ ISSની મુલાકાત લેનારા પ્રથમ અને અવકાશમાં જનારા બીજા ભારતીય હશે. આ પહેલા રાકેશ શર્મા 1984માં સોવિયેત યુનિયનના અવકાશયાનમાં અવકાશમાં ગયા હતા.
ISS જતા પહેલા, શુભાંશુ શુક્લાએ રવિવારે ફુલ ડ્રેસ રિહર્સલ કર્યું. આમાં, તેમણે એસેમ્બલી બિલ્ડિંગથી રોકેટ સુધી જવાની અને તેમાં બેસવાની પ્રક્રિયાને અનુસરી. શુભાંશુએ કહ્યું- તમે એવી વસ્તુનો ભાગ બનવા જઈ રહ્યા છો જે ખૂબ મોટી છે. હું તેનો ભાગ બનવા માટે ભાગ્યશાળી છું.