બુધવારે બેઇજિંગમાં યોજાયેલી બેઠકમાં ચીન, પાકિસ્તાન અને અફઘાનિસ્તાનના વિદેશ પ્રધાનોએ ચીન-પાકિસ્તાન આર્થિક કોરિડોર (CPEC)ને અફઘાનિસ્તાન સુધી લંબાવવા સંમતિ આપી. પાકિસ્તાન વિદેશ કાર્યાલય (PFO)એ સોશિયલ મીડિયા પર આ માહિતી આપી.
ચીનના શિનજિયાંગથી પાકિસ્તાનના બલુચિસ્તાનમાં ગ્વાદર બંદર સુધી બનનારો આ કોરિડોર અફઘાનિસ્તાન સુધી જશે. આ કોરિડોર દ્વારા, ચીન મધ્ય પૂર્વના દેશો સાથે રોડ કનેક્ટિવિટી સ્થાપિત કરવાની યોજના ધરાવે છે. પાકિસ્તાનથી અફઘાનિસ્તાન સુધી CPEC ક્યાં વિસ્તરશે તેની માહિતી હજુ ઉપલબ્ધ નથી.
પીએફઓ અનુસાર, પાકિસ્તાનના નાયબ વડાપ્રધાન અને વિદેશ પ્રધાન મોહમ્મદ ઇશાક ડાર, ચીનના વિદેશ પ્રધાન વાંગ યી અને અફઘાનિસ્તાનના કાર્યકારી વિદેશ પ્રધાન અમીર ખાન મુત્તાકીએ આજે બેઇજિંગમાં એક બેઠક યોજી હતી.
બેઠકમાં, ત્રણેય મંત્રીઓએ પ્રાદેશિક સુરક્ષા અને આર્થિક સહયોગ વધારવા માટે પરસ્પર સહયોગ જરૂરી માન્યો. આ સાથે, રાજદ્વારી કાર્યને આગળ વધારવા અને માળખાગત વિકાસને પ્રોત્સાહન આપવા માટે નક્કર પગલાં લેવા અંગે ચર્ચા કરવામાં આવી.