મંગળવારે યુરોપિયન દેશ સર્બિયાની સંસદની અંદર વિપક્ષી સાંસદોએ સ્મોક ગ્રેનેડ ફેંક્યા હતા. સરકારની નીતિઓના વિરોધમાં અને વિરોધ કરી રહેલા વિદ્યાર્થીઓના સમર્થનમાં વિપક્ષે આ પ્રદર્શન કર્યું હતું.
સર્બિયાની સંસદમાં સર્બિયન પ્રોગ્રેસિવ પાર્ટીના નેતૃત્વ હેઠળના શાસક ગઠબંધને આ સત્રની કાર્યસૂચિને મંજૂરી મળતાંની સાથે જ કેટલાક વિપક્ષી નેતાઓ પોતાની બેઠકો પરથી ઊભા થઈ ગયા અને સ્પીકરની ખુરસી તરફ દોડી ગયા.
તેમણે ગૃહમાં સ્મોક ગ્રેનેડ ફેંક્યા, જેનાથી ગૃહ કાળા ધુમાડાથી ભરાઈ ગયું. આ દરમિયાન તેમની સુરક્ષા ગાર્ડ્સ સાથે ઝપાઝપી પણ થઈ.
સર્બિયન સંસદ મંગળવારે દેશની યુનિવર્સિટીઓ માટે ભંડોળ વધારવા માટે એક કાયદો પસાર કરવાની હતી. આ સાથે જ વડાપ્રધાન મિલોસ વુસેવિકના રાજીનામા પર પણ ચર્ચા થવાની હતી, પરંતુ શાસક ગઠબંધન દ્વારા રજૂ કરાયેલી કાર્યસૂચિ પરના અન્ય મુદ્દાઓએ વિપક્ષ ગુસ્સે ભરાયા. આ પછી આ હંગામો થયો.
સ્પીકર એના બ્રનાબિકે જણાવ્યું હતું કે હુમલામાં બે સાંસદ ઘાયલ થયા છે, જેમાંથી એક જાસ્મિના ઓબ્રાડોવિક ગંભીર હાલતમાં છે. સ્પીકરે કહ્યું હતં કે સંસદ એનું કામ ચાલુ રાખશે.