ઈરાની પેટ્રોલિયમ ઉત્પાદનોના વેચાણ અને પરિવહનમાં મધ્યસ્થી કરવા બદલ યુએસ સરકારે ભારતમાં સ્થિત ચાર કંપનીઓ પર પ્રતિબંધો લાદ્યા હતા. ઈન્ડિયન એક્સપ્રેસના અહેવાલ મુજબ, યુએસ ફાઇનાન્સ ડિપાર્ટમેન્ટે સોમવારે એક પ્રેસ રિલીઝ જારી કરીને આ અંગે માહિતી આપી હતી.
અમેરિકાનું કહેવું છે કે ઈરાનની ઓઈલ નિકાસ ગેરકાયદેસર શિપિંગ નેટવર્ક દ્વારા કરવામાં આવે છે. ડોનાલ્ડ ટ્રમ્પની ‘મહત્તમ દબાણ’ નીતિ હેઠળ, અમેરિકા એવા નેટવર્ક્સ સામે કાર્યવાહી કરી રહ્યું છે જે ઈરાનની આવકના સ્ત્રોતને રોકી શકે છે.
યુએસ ઓફિસ ઓફ ફોરેન એસેટ કંટ્રોલ અને ડિપાર્ટમેન્ટ ઓફ સ્ટેટ અનુસાર, આ 4 ભારતીય કંપનીઓના નામ છે – ફ્લક્સ મેરીટાઇમ એલએલપી (નવી મુંબઈ), બીએસએમ મરીન એલએલપી (દિલ્હી-એનસીઆર), ઓસ્ટિનશિપ મેનેજમેન્ટ પ્રાઇવેટ લિમિટેડ (દિલ્હી-એનસીઆર) અને કોસ્મોસ લાઇન્સ ઇન્ક (તંજાવુર).
આ 4 કંપનીઓમાંથી 3 કંપનીઓ પર ઈરાની ઓઈલ અને પેટ્રોલિયમ ઉત્પાદનોના પરિવહનમાં સામેલ જહાજોના વાણિજ્યિક અને તકનીકી સંચાલનને કારણે પ્રતિબંધ મૂકવામાં આવ્યો હતો. જ્યારે કોસ્મોસ લાઇન્સ પર ઇરાની પેટ્રોલિયમના પરિવહનમાં સામેલ થવા બદલ પ્રતિબંધ મૂકવામાં આવ્યો હતો.