રાજકોટ શહેરના પૂર્વ વિસ્તારમાં મોરબી રોડ પર સરકારી જમીન ઉપર અનેક કોમર્સિયલ બાંધકામો ખડકાઇ ગયાની હકીકત ધ્યાનમાં આવતા મામલતદારે 9 દિવસ પૂર્વે નોટિસ આપ્યા બાદ મંગળવારે બુલડોઝર ફેરવી દઇ રૂ.50 કરોડની 22651 ચોરસ મીટર જમીન ખુલ્લી કરાવી હતી. આ સરકારી જમીન પર 15 કોમર્સિયલ બાંધકામો ઉપરાંત દબાણકારોએ ક્રિકેટની 6 પિચ બનાવી નાખી ત્યાં સુધી તે વહીવટી તંત્રને ધ્યાન ન પડતા અનેક સવાલો ઊઠી રહ્યા છે.
રાજકોટ શહેર પૂર્વ વિસ્તારમાં આવેલ સરકારી ખરાબાની જમીન સરવે નં.53/2 પૈકી 3ની યુ.એલ.સી.ની ફાજલ થયેલી અંદાજે રૂ.50 કરોડની કુલ 22,561 ચોરસ મીટર જમીનની કિંમતી જગ્યા ઉપર ગેરકાયદે બાંધકામ કરાયેલા કુલ 15 કોમર્સિયલ દબાણ દૂર કરવામાં આવ્યા છે. આ જગ્યામાં એક હોટેલ, પાંચ ચાની હોટેલ, એક પંક્ચરની કેબિન, ચાર પાનની કેબિન, પાંચ સિઝન સ્ટોર, એક બોક્સ ક્રિકેટ જેમાં 6 સિમેન્ટની પાકી પિચ, એક કાર વોશ સેન્ટરનું ડિમોલિશન કરવામાં આવ્યું હતું.