રાજકોટમાં ઓનલાઈન છેતરપિંડીનાં બનાવોમાં સતત વધારો થઈ રહ્યો છે. ક્રેડિટ કાર્ડ અને લોન સહિત હાલમાં યાત્રાનાં નામે છેતરપિંડીનાં બનાવો પણ સામે આવી રહ્યા છે. તાજેતરમાં જ આવો એક બનાવ સામે આવ્યો હતો. જેમાં ઉત્તરાખંડ રાજ્ય ખાતે ચારધામ યાત્રાના પેકેજના નામે ઓનલાઈન રૂ. 6,66,999 પડાવી લઈ ફ્રોડ થયાની ફરિયાદ નોંધાઈ હતી. આ ફરિયાદના આધારે સાયબર ક્રાઇમ પોલીસે આરોપી પ્રવીણકુમાર રામકુમાર શર્માને ઉત્તરપ્રદેશનાં મુઝફ્ફરનગર ખાતેથી ઝડપી પાડ્યો હતો.
પ્રાપ્ત વિગત અનુસાર, આરોપી પ્રવીણકુમારે અતિથી ટ્રીપ હોલીડેઝ નામની ટુર્સ કંપનીનાં નામે ઓનલાઈન ખોટી જાહેરાત મૂકી હતી. ફરિયાદીને ચારધામ યાત્રા આપવાનું જણાવી વિશ્વાસમાં લઈ કુલ રૂ. 6,66,999 પડાવી લઈ ફરિયાદીને કોઈ ટુર્સ પેકેજ આપ્યું નહોતું. સમગ્ર મામલે પોતાની સાથે ઓનલાઈન છેતરપિંડી થઇ હોવાનું સામે આવતા ભોગ બનનારે સાયબર ક્રાઇમ પોલીસમાં આ અંગેની ફરિયાદ નોંધાવી હતી. આ ફરિયાદના આધારે સાયબર ક્રાઇમ પોલીસે બેંક એકાઉન્ટનાં આધારે તપાસ હાથ ધરી હતી.
સાયબર ક્રાઇમ પોલીસે આરોપીનાં બેંક ખાતાની વિગત તથા મોબાઈલ નંબરનાં એસ.ડી.આરની વિગત મંગાવતા ખાતાધારક નું નામ પ્રવિણકુમાર રામકુમાર શર્મા હોવાનું સામે આવ્યું હતું. તેમજ સરનામું હરીદ્વાર ઉતરાખંડનું હતું. જોકે, પ્રવીણકુમાર શર્માએ પોતાનો મોબાઈલ બંધ કરી દીધો હતો. જેને પગલે ટેકનિકલ એનાલીસીસ કરી આરોપીનો હાલનો નવો ચાલુ નંબર મેળવી નવું સરનામુ મેળવ્યું હતું. આરોપીને ઉત્તર પ્રદેશનાં મુઝફ્ફરનગર ખાતેથી શોધી કાઢી અટકાયત કરી છે.