રાજકોટ મહાનગરપાલિકાની ફૂડ શાખા દ્વારા આજે દરોડા પાડવામાં આવ્યા હતા. જેમાં ઢેબર રોડ ઉપર આવેલા જ્યુબેલી પાસેથી રાજુભાઈ ઢોસાવાળાને ત્યાંથી 19 કિલો અખાદ્ય જથ્થો ઝડપી તેનો નાશ કરવામાં આવ્યો હતો. આ સાથે જ ત્યાંથી તેમજ રાજુભાઈ ઈડલીવાળાને ત્યાંથી સાંભારના તો નાનામવા રોડ ઉપર બિનાકા ડાઇનિંગ હોલમાંથી સબ્જીના નમૂના લેવામાં આવ્યા હતા. આ સાથે 39 અને ત્યાં ચેકિંગ કરવામાં આવ્યું હતું. જેમાંથી 28 ધંધાર્થીઓ પાસે ફૂડ લાઇસન્સ ન હોવાથી નોટિસ ફટકારવામાં આવી હતી.
રાજકોટ મહાનગરપાલિકા ફૂડ વિભાગ દ્વારા સર્વેલન્સ ચેકિંગ દરમિયાન ઢેબર રોડ ઉપર આવેલી જ્યુબેલી ચેમ્બર ગ્રા. ફલોર, શોપ નં.L-2 મુકામે આવેલ રાજુભાઇ ઢોસાવાળાની તપાસ કરતા પેઢીના સ્થળ પર સંગ્રહ કરેલ મેંદૂવડા, દાળવડાનો લોટ 15 કિ.ગ્રા. તથા ચટણી 4 કિ.ગ્રા. કુલ મળીને 19 કિ.ગ્રા. જથ્થો વાસી અખાદ્ય મળી આવતા સ્થળ પર નાશ કરવામાં આવેલ તેમજ પેઢીને યોગ્ય સ્ટોરેજ કરવા, હાઈજેનિક કન્ડિશન જાળવવા તથા લાયસન્સ મેળવવા બાબતે નોટિસ આપવામાં આવી હતી. આ ઉપરાંત જ્યુબેલી ચેમ્બર ગ્રા. ફલોર પર આવેલ રાજુભાઇ ઇડલીવાળાની તપાસ કરતા પેઢીના સ્થળ પર સંગ્રહ કરેલ મેંદૂવડા, દાળવડા તથા બાંધેલો લોટનો 7 કિ.ગ્રા. જથ્થો વાસી અખાદ્ય મળી આવતા સ્થળ પર નાશ કરવામાં આવ્યો હતો. તેમજ પેઢીને યોગ્ય સ્ટોરેજ કરવા તથા લાયસન્સ મેળવવા બાબતે નોટિસ આપવામાં આવી હતી.