તારીખ 10 ડિસેમ્બર, 2008… અમેરિકાના ઇતિહાસમાં સૌથી મોટી નાણાકીય છેતરપિંડીનો ખુલાસો થયો. મંદીમાં નાદારીનો સામનો કરી રહેલા અમેરિકન ફાઇનાન્સર બર્નાર્ડ લોરેન્સ મેડોફે તેમના પુત્રો માર્ક અને એન્ડ્રુને કહ્યું કે તેમનો એડવાઇઝરી બિઝનેસ “એક મોટું જૂઠાણું” છે.
પુત્રોએ આ અંગે FBIને ફરિયાદ કરી. મેડોફની 11 ડિસેમ્બર, 2008ના રોજ ધરપકડ કરવામાં આવી હતી. આ છેતરપિંડી આશરે 65 અબજ ડોલરની હતી. આજના દરો મુજબ, આ રકમ લગભગ 5.54 લાખ કરોડ રૂપિયા છે. મેડોફે 17 વર્ષ સુધી વિશ્વભરના હજારો રોકાણકારોને મૂર્ખ બનાવ્યા.
મેડોફ પર વિશ્વાસ કરનારા ઘણા લોકોએ તેમના નિવૃત્તિના પૈસા ગુમાવ્યા. કોર્ટે તેને 150 વર્ષની જેલની સજા ફટકારી. પુત્ર માર્કે 2010માં આત્મહત્યા કરી હતી.
બીજા પુત્ર, એન્ડ્રુનું 2014માં કેન્સરથી મૃત્યુ થયું. આ છેતરપિંડી એક વ્યક્તિએ કરી હતી જે સ્થાનિક સ્ટોક એક્સચેન્જ નાસ્ડેકના ભૂતપૂર્વ ચેરમેન પણ હતો.