ટૂ વ્હિલ, ફોર વ્હિલ હોય કે ભારે વાહન, ચાલકો વાહનોના નિયમોને નેવે મૂકી બેરોકટોક ચલાવી રહ્યાં છે. જેને કારણે અકસ્માતના બનાવો પણ છાશવારે પ્રકાશમાં આવતા રહે છે. હાઇવે પર નિયમોનું ઉલ્લંઘન કરી વાહન ચલાવતા ચાલકો સામે કાર્યવાહી કરવા આરટીઓ તંત્ર દ્વારા છેલ્લા કેટલાક સમયથી દર મહિને ડ્રાઇવ ગોઠવી રહી છે. ત્યારે આરટીઓ તંત્ર દ્વારા જુલાઇ મહિનામાં 1416 કેસની સામે ઓગસ્ટ મહિનામાં અલગ અલગ નિયમોનો ભંગ કરનાર 1445 ચાલક સામે દંડાત્મક કાર્યવાહી કરી છે અને છેલ્લા બે મહિનામાં એક કરોડથી વધુની રકમનો દંડ વસૂલ કર્યો છે.
વાહન ચલાવતી વખતે હેલ્મેટ નહીં પહેરનાર, વાહનનું પીયુસી નહીં કરાવનાર, કાર ચલાવતી વેળાએ સીટબેલ્ટ નહીં બાંધનાર અને વાહનનો વીમો નહીં ઉતારવાના કેસોમાં વધારો થયો છે. જુલાઇ મહિનામાં 327ની સામે ઓગસ્ટ મહિનામાં 339 કેસ આરટીઓ તંત્રે કર્યા હતા. ઓગસ્ટ મહિનામાં કરેલા અલગ અલગ પ્રકારના 1445 કેસમાં વાહનચાલકો પાસેથી તંત્રે રૂપિયા 50,32,908ની રકમનો દંડ વસૂલ કર્યો છે.