અમેરિકન રાષ્ટ્રપતિ ટ્રમ્પની ધમકીના છ કલાક પછી, હમાસે ગાઝામાં યુદ્ધવિરામ માટે સંમતિ આપી છે. હમાસે શુક્રવારે રાત્રે જાહેરાત કરી હતી કે તે ટ્રમ્પની યોજનામાં દર્શાવેલ તમામ કેદીઓને (જીવંત કે મૃત) મુક્ત કરવા અને ગાઝા પરનો કબજો છોડવા તૈયાર છે.
હમાસે એમ પણ કહ્યું કે આ અઠવાડિયે રજૂ કરાયેલા રાષ્ટ્રપતિ ટ્રમ્પના 20-મુદ્દાના શાંતિ કરારના કેટલાક ભાગો પર વાટાઘાટો જરૂરી છે. અલ જઝીરા અનુસાર, હમાસના પ્રતિભાવમાં શસ્ત્રો છોડવાનો ઉલ્લેખ નહોતો.
હમાસની જાહેરાત બાદ, ટ્રમ્પે ઇઝરાયલને ગાઝામાં તાત્કાલિક હુમલા બંધ કરવા હાકલ કરી હતી. ઇઝરાયલે હજુ સુધી કોઈ પ્રતિક્રિયા આપી નથી.
નેતન્યાહૂ સાથે મુલાકાત બાદ ટ્રમ્પે કહ્યું હતું કે જો હમાસ આ યોજના સાથે સંમત ન થાય, તો ઇઝરાયલને તેને ખતમ કરવાનો સંપૂર્ણ અધિકાર છે અને અમેરિકા આમાં તેનું સમર્થન કરશે.
દરમિયાન, નેતન્યાહૂએ જણાવ્યું હતું કે ગાઝા એક શાંતિપૂર્ણ વહીવટ હશે, જેમાં હમાસના બધા શસ્ત્રો દૂર કરવામાં આવશે, અને ઇઝરાયલ ધીમે ધીમે ગાઝામાંથી પાછું હટી જશે.