રાજકોટની સૌરાષ્ટ્ર યુનિવર્સિટીની જુડોની રમતવીર રીતુ વાજાએ મોટી સિદ્ધિ હાંસિલ કરી છે. ઉતરાખંડમાં ચાલી રહેલા 38મા રાષ્ટ્રીય રમતોત્સવમાં જુડો ટીમ રમતમાં તેણીએ સિલ્વર મેડલ જીત્યો છે. જે સૌરાષ્ટ્ર યુનિવર્સિટી માટે પણ ગૌરવની વાત છે. સૌરાષ્ટ્ર યુનિવર્સિટીના કુલપતિ પ્રોફે. ઉત્પલભાઈ જોશીએ રીતુ વાજાની આ સિધ્ધિ બદલ અભિનંદન અને શુભેચ્છાઓ પાઠવી હતી. આ નેશનલ ગેમ્સમાં ભારતભરની યુનિવર્સિટીઓના રમતવીરોએ ભાગ લીધો છે.
સૌરાષ્ટ્ર યુનિવર્સિટીના કુલપતિ પ્રોફે. ઉત્પલ જોશીએ જણાવ્યું હતું કે, વિદ્યાર્થીઓના સર્વાંગી વિકાસ માટે સૌરાષ્ટ્ર યુનિવર્સિટી કાર્યરત છે. શિક્ષણ-સંશોધનની પ્રવૃત્તિઓ સાથે સૌરાષ્ટ્ર યુનિવર્સિટી દ્વારા વિદ્યાર્થીઓને રમત-ગમત ક્ષેત્રમાં અગ્રેસર લઈ જવા પ્રોત્સાહિત કરવામાં આવે છે. સૌરાષ્ટ્ર યુનિવર્સિટીના શારીરિક શિક્ષણ વિભાગના નિયામકશ્રી, શારીરિક શિક્ષણના અધ્યાપકો તથા કોચ દ્વારા વિદ્યાર્થીઓને જરુરી માર્ગદર્શીત પુરુ પાડવામાં આવે છે. રમત-ગમતમાં રાષ્ટ્રીય અને આંતરરાષ્ટ્રીય સ્તરે સૌરાષ્ટ્ર યુનિવર્સિટી એ ઉંચી ઉડાન ભરી છે અને અનેક વિદ્યાર્થીઓએ મેડલ્સ જીતી સૌરાષ્ટ્ર યુનિવર્સિટીનું ગૌરવ વધાર્યું છે.