શેરબજાર માટે આ સપ્તાહ વર્ષનું સૌથી મહત્વપૂર્ણ સપ્તાહ સાબિત થવાનું છે. 1 ફેબ્રુઆરીએ નાણામંત્રી નિર્મલા સીતારમણ બજેટ રજૂ કરશે, જેના પર સમગ્ર દેશની નજર છે.
બજેટ ઉપરાંત, આ સપ્તાહે અમેરિકી ફેડરલ રિઝર્વ (FOMC)ની વ્યાજ દરો પરની મીટિંગ, દિગ્ગજ કંપનીઓના ત્રીજા ક્વાર્ટર (Q3)ના પરિણામો અને જાન્યુઆરી મહિનાના ઓટો સેલ્સના આંકડા પણ જાહેર થશે.
ગયા સપ્તાહે ભારતીય બજારમાં ભારે ઘટાડો જોવા મળ્યો હતો, જેમાં સેન્સેક્સ 2,033 અંક અને નિફ્ટી 646 અંક સુધી તૂટી ગયો હતો. આવા સમયે, રોકાણકારોની નજર આ મોટા પરિબળો પર રહેશે જે બજારની આગામી દિશા નક્કી કરશે.
- કેન્દ્રીય બજેટ: રવિવારે પણ બજાર ખુલશે
નાણામંત્રી નિર્મલા સીતારમણ 1 ફેબ્રુઆરીએ બજેટ રજૂ કરશે. આ વખતે બજેટથી મધ્યમ વર્ગને ટેક્સમાં રાહત અને ઇન્ફ્રાસ્ટ્રક્ચર પર ખર્ચ વધવાની અપેક્ષા છે. ખાસ વાત એ છે કે બજેટ રવિવારે હોવાને કારણે NSE અને BSEએ આ દિવસે સ્પેશિયલ ટ્રેડિંગ સેશન રાખવાનો નિર્ણય કર્યો છે.
- અમેરિકી ફેડરલ રિઝર્વનો નિર્ણય
27 અને 28 જાન્યુઆરીના રોજ અમેરિકી ફેડરલ રિઝર્વની મીટિંગ બેઠક યોજાશે. બજારને અપેક્ષા છે કે આ વખતે વ્યાજ દરોમાં કોઈ ફેરફાર થશે નહીં, પરંતુ ભવિષ્ય માટે શું સંકેતો મળે છે. તેના પર રોકાણકારોની નજર રહેશે. જો ફેડ ચેરમેન ભવિષ્યમાં દરો ઘટાડવાનો સંકેત આપે છે, તો તે ભારતીય બજાર માટે સકારાત્મક રહેશે.