રીબડા પાસે આવેલા સમૃદ્ધિ ઇન્ડસ્ટ્રીઝ ઝોનમાં બે કારખાનાને તસ્કરોએ નિશાન બનાવી અહીંથી રૂ.૧.૨૦ લાખની મત્તા ઉસેડી લીધી હતી. જે અંગે સીસીટીવી ફૂટેજ ચકાસતા રાત્રીના રિક્ષામાં આવેલી ત્રિપુટીએ ચોરીના બનાવને અંજામ આપ્યો હોવાનું દેખાયું હતું.
રાજકોટમાં રહેતા વેપારી પારસ સુરેશભાઈ મકવાણા દ્વારા ગોંડલ તાલુકા પોલીસ સ્ટેશનમાં નોંધાવવામાં આવેલી ફરિયાદમાં જણાવ્યું હતું કે તેમણે રીબડા પાસે સમૃદ્ધિ ઇન્ડસ્ટ્રીઝ ઝોનમાં કારખાનામાં ફિટીંગ કરવાનો સમાન મંગાવ્યો હોય કારખાનામાં મશીનરીની ફીટીંગ કરવાનો ખોલતા તેમાં મશીનની પીન, ગેર, સ્લાઇડર ગેરની કંગની, મોટર, સબમર્સીબલ કેબલ, વાયર સ્વીચ સહિતનો સામાન અહીં મૂકી રાત્રિના 11 કારખાનું બંધ કરી જતા રહ્યા હતા. ત્યારબાદ બીજા દિવસે સવારે 9:30 વાગ્યે કારખાને આવતા કારખાને આ સામાન જોવા મળ્યો ન હતો અને તેની ચોરી થઈ ગઈ હોવાનું માલુમ પડ્યું હતું. જેથી તેમણે ભાગીદાર અશોકભાઈને ફોન કરી અહીં બોલાવ્યા હતા.
બાદમાં સીસીટીવી કેમેરા તપાસતા અજાણ્યા ત્રણ શખ્સો કારખાનામાં આવતા જોવા મળ્યા હતા. ત્યારબાદ અંદરથી સામાન લઈ નીકળતા હોવાનું પણ નજરે પડ્યું હતું. આજુબાજુમાં રિક્ષાના ટાયરના નિશાનો હતા. બાદમાં કારખાનેદારે તપાસ કરતા માલુમ પડ્યું હતું કે આ ઘટનાના એક બે દિવસ પૂર્વે બાજુમાં આવેલા નરેન્દ્રભાઈના કારખાનામાં પણ તસ્કરોએ ઘૂસી 600 કિલો જેટલી વજનની લોખંડની પ્લેટ ચોરી કરી ગયા હતા.