રાજકોટના ભક્તિનગર સર્કલ પાસે આવેલા સહકાર મેઈન રોડ ઉપર આજે સવારે કારચાલક યુવાને કાર પરનો કાબૂ ગુમાવ્યો હતો. મોર્નિંગ વોકમાં નીકળેલા આધેડને ઉડાવી 15 ફૂટ સુધી ઢસડયા હતા અને ત્યારબાદ દુકાનના પગથિયે બેસેલી યુવતીને હડફેટે લઈ કાર દુકાન સાથે અથડાઈ હતી. આ શ્વાસ થંભાવી દેતા ગંભીર અકસ્માતના સીસીટીવી સામે આવ્યા છે. અકસ્માત બાદ કારચાલક ઘટનાસ્થળેથી ફરાર થઈ ગયા હતો. પોલીસે ફરાર કારચાલક યુવકની શોધખોળ હાથ ધરી છે. આ ઘટનામાં આધેડને ગંભીર ઈજા પહોંચતા સારવાર અર્થે હોસ્પિટલમાં ખસેડાયા હતા, જ્યાં તેઓનું મોત નીપજ્યું હતું. યુવતીને સદનસીબે સામાન્ય ઈજાઓ થતાં સારવાર માટે ખસેડાઇ હતી.
કારે એક્ટિવાને હડફેટે લઈ આધેડને ઉડાડ્યા
આ બનાવની પ્રાપ્ત વિગત મુજબ, રાજકોટ શહેરના ભક્તિનગર સર્કલ પાસે આવેલા સહકાર મેઈન રોડ ઉપર ત્રિશૂલ ચોક પાસે કારચાલક (GJ 03 MH 4905) યુવાન પૂરપાટ ઝડપે કાર ચલાવી રહ્યો હતો. જે દરમિયાન કારચાલક યુવાને ડાબી તરફથી અચાનક કારનું સ્ટીયરિંગ જમણી તરફ ફેરવી નાખ્યું હતું. જેને લીધે મોર્નિંગ વોકમાં નીકળેલા 50 વર્ષીય નલીનભાઈ નરોતમભાઈ સિદ્ધપુરાને હડફેટે લઈ લગભગ 15 ફૂટ સુધી ઢસડ્યા હતા. ત્યારબાદ ચોકમાં દુકાન પાસે બેસેલી 18 વર્ષીય વિદ્યાર્થિની કુમકુમ મહેશભાઈ કાનાણીને પણ કારચાલક હડફેટે લીધી હતી. જે બાદ કાર દુકાન સાથે ધડાકા સાથે અથડાઇ તુરંત રિવર્સ જતી રહી હતી.
આ ઘટનાના CCTV પણ સામે આવ્યા છે, જે શ્વાસ થંભાવી દે તેવા છે. જેમાં જોઈ શકાય છે કે, પૂરઝડપે આવતી કાર અચાનક ડાબી તરફ વળે છે અને રોડની સાઈડમાં પાર્ક કરેલા એક્ટિવાને હડફેટે લઈ રોડ પરથી પસાર થતા આધેડને ઉડાવે છે. જે બાદ કાર રોકાવાને બદલે આગળ વધી દુકાનના પગથિયે બેસેલી 3 યુવતી તરફ જાય છે. જેમાં બે યુવતી ઝડપથી ખચી જતા એક યુવતી કારની ઝપેટમાં આવી જાય છે, જે કાર અને દુકાનના શટર વચ્ચે દબાઈ જાય છે. જોકે, યુવતીને હડફેટે લીધા બાદ કાર તુરંત પાછળ ધસી જાય છે. આ અકસ્માત બાદ કારચાલક ઘટનાસ્થળેથી ફરાર થઈ જાય છે.