રાજકોટ શહેરમાં નફાખોરી માટે ભેળસેળ અને હલકી ગુણવત્તાની વસ્તુઓ વધુ પૈસા લઈને વેચવાની વૃત્તિ અમુક તત્ત્વોમાંથી જતી જ નથી. ફરી એકવાર આવા લેભાગુ તત્ત્વોનો પર્દાફાશ થયો છે. ફૂડ શાખાએ લીધેલા એક સેમ્પલમાં કપાસિયા તેલના નામે પામોલીન ધાબડીને વેચવાનું કૌભાંડ સામે આવ્યું છે.
કપાસિયા તેલના નામે પામોલીન ધાબડીને વેચવાનું કૌભાંડ સામે આવ્યું
મનપાની ફૂડ શાખાએ દોઢ મહિના પહેલા ચુનારાવાડ-4માં સુનિલ હરેશ રાવતાણીની પેઢીમાં વેચાતા સ્વસ્તિક બ્રાન્ડ કપાસિયા તેલના 1 લિટર પેકેટનો નમૂનો લીધો હતો. આ પેઢીમાં લૂઝ તેલ મગાવીને તેને ફરી પેકિંગ કરી લેબલ લગાવી વેચવામાં આવતું હતું. સેમ્પલ લીધા બાદ તેના રિપોર્ટ આવતા તંત્ર પણ ચોંક્યું હતું કારણ કે, જે તેલ કપાસિયાના નામે વેચાઈ રહ્યું છે તેમાં 1 ટકા પણ કપાસિયાની હાજરી મળી નથી. આ તમામ તેલ પામોલીન જ હતું અને તેને કપાસિયાના નામે વેચી દેવાતું હતું. આ નમૂનો ફેલ થતા હવે એજ્યુડિકેટિંગ ઓફિસર અધિક કલેક્ટરની કોર્ટમાં કેસ ચાલશે.