મંગળવાર અને બુધવારની રાત્રે પ્રયાગરાજ મહાકુંભમાં સંગમ કિનારે થયેલી ભાગદોડમાં 35થી 40 લોકોના મોત થયા છે. જેમાં ગુજરાતના મહેસાણા જિલ્લાના વિસનગર તાલુકામાં આવેલા કડા ગામના વતની મહેશભાઈ સોમાભાઈ પટેલનું પણ મોત થયું છે. અકસ્માતના 17 કલાક પછી ઉત્તર પ્રદેશ સરકારે 30 લોકોના મોતની પુષ્ટિ કરી.
સાંજે 6.30 વાગ્યે મેળાના અધિકારી વિજય કિરણ આનંદ અને ડીઆઈજી વૈભવ કૃષ્ણાએ 3 મિનિટની પ્રેસ કોન્ફરન્સ યોજી હતી. ડીઆઈજી વૈભવ કૃષ્ણાએ કહ્યું- ભાગદોડમાં 30 શ્રદ્ધાળુઓના મોત થયા. 60 લોકો ઘાયલ થયા છે. 25 મૃતદેહોની ઓળખ થઈ ગઈ છે.
તેમણે કહ્યું કે, ભાગદોડમાં મૃત્યુ પામેલા લોકોમાં સૌથી વધુ 19 ઉત્તર પ્રદેશના, 4 કર્ણાટકના અને 1-1 ગુજરાત અને આસામના હતા.
તેમણે કહ્યું કે ઘાટ પર કેટલાક બેરિકેડ તૂટી ગયા હતા, જેના કારણે કેટલાક લોકો જમીન પર સૂતેલા કેટલાક ભક્તો પર ચઢી ગયા હતા. આ પછી અંધાધૂંધી મચી ગઈ. તેમણે કહ્યું કે મેળામાં કોઈ VIP પ્રોટોકોલ રહેશે નહીં.
મેળાના અધિકારી વિજય કિરણ આનંદે જણાવ્યું હતું કે, મહાકુંભમાં આવેલા ભક્તોને પાછા મોકલવાનું કામ ચાલી રહ્યું છે. હવે સવાલો ના પૂછો. તે જ સમયે સીએમ યોગીએ મૃતકોના પરિવારજનોને 25-25 લાખ રૂપિયાના વળતરની જાહેરાત કરી છે.