યૌન અપરાધી જેફ્રી એપસ્ટીન સાથે સંબંધિત નવી ફાઇલોમાં ખુલાસો થયો છે કે એક ભારતીય છોકરી પણ તેનો શિકાર બની હતી. દસ્તાવેજો અનુસાર, અમેરિકી અધિકારીઓએ તેને પીડિત વળતર ફંડમાંથી ચુકવણી અપાવવા માટે ભારતમાં શોધખોળ શરૂ કરી હતી.
13 જાન્યુઆરી 2020ના એક ઇમેઇલમાં અમેરિકી અધિકારીઓ વચ્ચે થયેલી વાતચીત સામે આવી છે. જેમાં ભારતમાં હાજર પીડિતાનું સરનામું અને માહિતી એકત્રિત કરવાનું કહેવામાં આવ્યું છે, જેથી ભારત સ્થિત અમેરિકી દૂતાવાસ દ્વારા તેનો સંપર્ક કરી શકાય. આ ઇમેઇલ એપસ્ટીનના ઓગસ્ટ 2019માં જેલમાં થયેલા મૃત્યુ પછીનો છે.
રિલીઝ કરાયેલા દસ્તાવેજોમાં આ મેઇલનું ટાઇટલ ‘એપસ્ટીન વિક્ટિમ્સ’ છે, જોકે, અધિકારીઓના નામ અને કેટલીક માહિતી છુપાવી દેવામાં આવી છે.
નવી ફાઇલોમાં 5 જૂન 2014ના રોજ બિલ ગેટ્સ અને એપસ્ટીન વચ્ચેની વાતચીતનો એક ઇમેઇલ શામેલ છે. આમાં એપસ્ટીન બિલ ગેટ્સને પૂછે છે કે શું ડો. હર્ષ વર્ધન સાથે 17 સપ્ટેમ્બરે ભારતમાં તેમની મીટિંગ છે. તે સમયે હર્ષવર્ધન કેન્દ્રીય સ્વાસ્થ્ય મંત્રી હતા.
આ ઉપરાંત, 2 એપ્રિલ 2017ના એક ઇમેઇલમાં ભારતના PR કંપની પ્રમોટર દિલીપ ચેરીયનનો પણ ઉલ્લેખ છે. આ મેઇલમાં એપસ્ટીનના સહયોગી ગિનો યુએ તેમને પૂછ્યું કે શું તેઓ દિલીપ ચેરીયનને મળવા માંગશે. ઇમેઇલમાં લખ્યું છે કે દિલીપ પેરિસમાં 3થી 6 એપ્રિલ સુધી રહેશે અને તેમણે 160 મિલિયન અમેરિકી ડોલરમાં પોતાની જાહેરાત અને પીઆર કંપની વેચી છે.
8 જુલાઈ 2010ના એક ઇમેઇલમાં એક મહિલાએ એપસ્ટીનને પોતાના ફ્લાઇટ અનુભવ વિશે લખ્યું. તેણે જણાવ્યું કે તેની પાસે બેઠેલા એક વૃદ્ધ ભારતીય વ્યક્તિએ દારૂ પીધો હતો અને તે વારંવાર તેની સાથે વાત કરી રહ્યો હતો અને તેને સ્પર્શી રહ્યો હતો.