કોંગ્રેસ નેતા પવન ખેડાએ બુધવારે તેલંગાણા હાઈકોર્ટમાં આગોતરા જામીન માટે અરજી કરી છે. આસામના સીએમ હિમંતા બિસ્વા સરમાની પત્નીએ તેમની વિરુદ્ધ FIR નોંધાવી છે. ખેડાએ 5 એપ્રિલે હિમંતાની પત્ની પર નકલી પાસપોર્ટ રાખવાનો આરોપ લગાવ્યો હતો.
તેના બે દિવસ પછી મંગળવારે આસામ પોલીસે દિલ્હીમાં પવન ખેડાના ઘરે દરોડો પાડ્યો. જોકે, તે સમયે પવન હૈદરાબાદમાં હતા. પોલીસ તેમના ઘરેથી કેટલાક દસ્તાવેજો લઈ ગઈ.
પવને દરોડા અંગે એક વીડિયો જાહેર કર્યો અને કહ્યું કે- આસામ પોલીસના 100 પોલીસકર્મીઓ તેમના ઘરમાં ઘૂસી ગયા. પોલીસ તેમના ઘરેથી બહેનનો ફોટો લઈ ગઈ. આ ઉપરાંત લેપટોપ અને આઈપેડ પણ જપ્ત કરવામાં આવ્યા.
આસામના મુખ્યમંત્રી હિમંતા બિસ્વા સરમા પર આરોપ લગાવતા તેમણે કહ્યું કે તેઓ તેમના પર પોલીસ છોડીને ડરાવવાનો પ્રયાસ કરી રહ્યા છે.
અસમ સીએમની પત્ની પાસે ત્રણ દેશો ઇજિપ્ત, એન્ટિગુઆ-બાર્બુડા અને UAEના પાસપોર્ટ છે. પવન ખેડાએ કોન્ફરન્સમાં ત્રણ પાસપોર્ટ પણ બતાવ્યા. તેમણે કહ્યું કે સરમાની રાજનીતિ મુસ્લિમો વિરુદ્ધ નફરત પર આધારિત છે, જ્યારે તેમની પત્ની પાસે બે મુસ્લિમ દેશોના પાસપોર્ટ છે. તેમણે આગળ કહ્યું કે હિમંતાની પત્ની 52 હજાર કરોડ રૂપિયાની અમેરિકી કંપનીની પણ માલિક છે.
અમેરિકામાં હિમંતાની પત્ની રિંકી ભુઈયા સરમાની એક કંપની છે. આ કંપનીની મેમ્બર લિસ્ટમાં રિંકી ભુઈયા સરમા, હિમંતા બિસ્વા સરમા અને તેમના પુત્રનું નામ છે. આ કંપનીનું બજેટ 52,000 કરોડ રૂપિયાનું છે. તેમણે દાવો કર્યો કે રિંકી સરમાની દુબઈમાં 2 પ્રોપર્ટી છે, જેની સંપૂર્ણ જાણકારી ઉપલબ્ધ છે.