જમ્મુ-કાશ્મીરના કઠુઆ જિલ્લામાં આતંકવાદીઓ અને સુરક્ષા દળો વચ્ચે અથડામણ ચાલી રહી છે. અધિકારીઓએ જણાવ્યું હતું કે, હીરાનગર સેક્ટરમાં પાકિસ્તાન સરહદ નજીક ચારથી પાંચ શંકાસ્પદો હોવાના સમાચાર હતા.
આ પછી સુરક્ષા દળોએ સાન્યાલ ગામ નજીક સર્ચ ઓપરેશન શરૂ કર્યું. સુરક્ષા દળોની સંયુક્ત ટીમ આતંકવાદીઓની નજીક પહોંચતાની સાથે જ તેઓએ ગોળીબાર શરૂ કરી દીધો. વિસ્તારમાં વધારાના સુરક્ષા દળો મોકલવામાં આવ્યા છે. ગોળીબાર વચ્ચે-વચ્ચે ચાલુ રહે છે.
17 માર્ચે, કુપવાડા જિલ્લામાં LOC પાસે ખુરમોરા રાજવાર વિસ્તારમાં સુરક્ષા દળો અને આતંકવાદીઓ વચ્ચે એન્કાઉન્ટર થયું હતું. આમાં એક આતંકવાદી માર્યો ગયો હતો જ્યારે કેટલાક આતંકવાદીઓ ઘેરો તોડીને ભાગી જવામાં સફળ રહ્યા હતા. આ અથડામણમાં એક સૈનિક પણ ઘાયલ થયો હતો.
અધિકારીઓએ કહ્યું હતું કે, આતંકવાદીઓની હાજરીની માહિતી મળ્યા બાદ, જચલદારાના ક્રુમહુરા ગામમાં ઘેરાબંધી અને શોધખોળ અભિયાન શરૂ કરવામાં આવ્યું હતું. આતંકવાદીઓએ સુરક્ષા દળો પર ગોળીબાર કર્યા બાદ એન્કાઉન્ટર શરૂ થયું. સવારથી ચાલી રહેલા એન્કાઉન્ટરમાં એક આતંકવાદી ઠાર મરાયો છે. તેની નજીકથી એક એસોલ્ટ રાઇફલ પણ મળી આવી હતી.