રાજકોટની ભાગોળે સ્માર્ટ સિટી અંતર્ગત કરોડોના ખર્ચે અટલ સરોવર ઉપરાંત ન્યુ રેસકોર્સનું નિર્માણ કરવામાં આવ્યું છે. જેનું સંચાલન ખાનગી કંપનીને સોંપવામાં આવ્યું છે. જો કે, અટલ સરોવર ખુલ્લું મકાયાના માત્ર 24 દિવસમાં એક પછી એક વિવાદો સામે આવી રહ્યા છે. ત્યારે હવે એન્ટ્રી ટિકિટના રૂપિયા 29.50ને બદલે ખુલ્લેઆમ રૂપિયા 30 ઉઘરાવવામાં આવી રહ્યા હોવાનું અને વ્હીલચેર માટે 1 હજાર રૂપિયા ડિપોઝિટ લેવાતી હોવાનું તેમજ સમાન અને બેગ રાખવા માટે વધારાના રૂપિયા 30નો ચાંદલો કરવો પડતો હોય તેવું પણ સામે આવ્યું છે. જેને પગલે DMC નંદાણીએ જણાવ્યું હતું કે, સંચાલકોને રૂબરૂ બોલાવી જરૂરી સૂચના આપવામાં આવશે. અને જરૂરિયાત મુજબ પગલાં પણ લેવામાં આવશે.
પ્રાપ્ત વિગત મુજબ તાજેતરમાં અટલ સરોવર ખાતે બહારથી રેંકડીઓ બોલાવીને તેની પાસે 40 ટકા વસૂલી ખાણીપીણીની વસ્તુઓનું વેચાણ અટલ સરોવરમાં થતું હોવાનું સામે આવતા મનપા દ્વારા તાત્કાલિક રેંકડીઓ દૂર કરવામાં આવી હતી. ત્યારે હવે સંચાલકોની અન્ય કેટલીક મનમાની સામે આવી છે. જેમાં રૂપિયા 25+4.50= 29.50 રૂપિયા એન્ટ્રી ટિકિટને બદલે ખુલ્લેઆમ રૂપિયા 30 ઉઘરાવવામાં આવી રહ્યા છે. એટલે કે, પ્રતિ 1 લાખ સહેલાણી પાસેથી રૂપિયા 50 હજાર વધારાના વસૂલવામાં આવી રહ્યા છે. તેમજ વરિષ્ઠ નાગરિકો માટે રાખવામાં આવેલી વ્હીલચેરના રૂપિયા 100 ભાડા સાથે રૂપિયા 1 હજારની ડિપોઝિટ લેવામાં આવી રહી છે. તેમજ અંદર કોઈપણ થેલી, બેગ કે સામાન માટેની મનાઈ હોવાથી તે સાચવવાના અલગથી રૂપિયા 30 ચાર્જ વસૂલવામાં આવી રહ્યો છે. એટલું જ નહીં મોબાઈલના આ યુગમાં કેમેરા ભાડે આપવાના અધધ રૂપિયા 200 વસૂલવામાં આવી રહ્યા હોવાનું સામે આવ્યું છે.
સમગ્ર મામલે રાજકોટ મહાનગરપાલિકાના ડેપ્યુટી કમિશનર સી. કે. નંદાણીએ જણાવ્યું હતું કે, ટિકિટમાં છુટ્ટાના અભાવને કારણે રૂપિયા 30 વસૂલાય છે. જેના માટે ઓનલાઈન પેમેન્ટ જેવી સુવિધા શરૂ કરવામાં આવશે. તેમજ અન્ય જે વસૂલાત કરવામાં આવી રહી છે, તેવી કોઈ જોગવાઈ કરવામાં આવી નથી. ત્યારે આ બાબતે સંચાલકોને રૂબરૂ બોલાવી જરૂરી સૂચના આપવામાં આવશે. તેમજ નિયમ મુજબ કડક કાર્યવાહી પણ કરવામાં આવશે. લોકોને પડતી આ મુશ્કેલીઓ અંગે મનપા સતર્ક છે અને આવી મુશ્કેલીઓ દૂર કરવા તાત્કાલિક પગલાં લેવાની ખાતરી પણ તેમણે આપી છે.